Vaikuttâsâi árvuštâllâm

Vaikuttâsâi árvuštâllâm uáivild vuávájum tooimâi, haavâi tâi miärádâsâi munedistum vaikuttâsâi systemaatlii selvâttem já árvuštâllâm ovdil ko toh olášuttojeh tâi jo orroo tooimâ vuáđulii karttim. Árvuštâlmist kárttojeh vaikuttâsah ovdâmerkkân pirrâsân, šoŋŋâdâhân, ekonomian, kulttuurân, tiervâsvuotân já ulmui eellimtiilijd.

Sämmilij päikkikuávlust vaikuttâsâi árvuštâlmist tiäduttuvvojeh eromâšávt sosiaalliih, kulttuurliih já ekologâliih killeelvuođah já kyeddimnaavcah já toi vaikuttâsah páihálâšsiärvádâhân, ärbivuáváláid iäláttâssáid (ei. puásuituálu, kuálástem, miäcástem já nuurrâm) sehe ärbivuáválii tiäđu (äʹrbbvuõđlaž teâtt, árbevirolaš diehtu, perinteinen tieto) siäilumân. Árvuštâlmist kalga väldiđ huámmášumán meid kumulatiivlijd vaikuttâsâid ađai sierâ tooimâi ohtsâšvaikuttâsah kuhes áigáduvâst já sierâ sektorijn (om. eres mađhâšemtoimâ (ml. jiešráđáliih mađhâšeijeeh), kolletoidem, jotolâh). Pyereest olášuttum vaikuttâsâi árvuštâllâm tuárju ovdâsvástádâslii já eettisávt kilelis mađhâšem, tuástu hááituid já naanood oovtâstpargo páihálâšsiärváduv já mađhâšemtuáimei kooskâ. Irâttâs mađhâšemtooimâ vaikuttâsâi árvuštâlmist selvâttuvvojeh ovdâmerkkân ton vaikuttâsah puásuituálukuávluid, luándupirrâsáid, kulttuuráárbán já páihálâšsiärváduv pyereestvajemân já kollimkilleelvuotân.

Keevâtlávt vaikuttâsâi árvuštâllâm tahhoo uássin SMEKS-vuávám. Sertifikaat usâdijn irâttâs dokumentist ovdâmerkkân jieijâs kiäinui já palvâlusâi vaikuttâsâid puásuituálun, kulttuuráárbán já páihálâšsiärváduv pyereestvajemân sehe kovvee, maht hááituh iästojeh já čuávvojeh. Mađhâšemtooimâ vaikuttâsah ärbivuáválii tiäđu siäilumân pyehtih leđe sehe positiivliih (om. mainâstem já kietâtyejiäärbi sirdem uđđâ suhâpuolváid) já negatiivliih (om. tiäđui puunnjâm tâi lovettes kiävttu). Árvuštâllâm vievâst visásmittoo, ete tiätu siäilu siärváduv haaldust já sirdâšuvá ovdâskulij puigâ häämist.