Puigâvuotâ (aitous)

Ovdâsvástádâslâš algâaalmugmaađhâšmist puigâvuođâ miäruštâllâm táárgut algâaalmug uáinu puigâvuođâst já tast, maid halijdeh čäittiđ, kevttiđ já toohâđ kávpálâžžân jieijâs kulttuurist já maht. Ain taat uáinu ij västid tom, maid mađhâšeijee jurdá algâaalmugist tâi tast, maid tot oovdâst.  Sämivuotân vuáđuduvvee maađhâšmist puigâvuotâ šadda fiäránijn já eellum elimist, aargâst já juhleest jieijâs ellee kulttuurenâduvâst.  Puigâ elimist já tast muštâlmist ij taarbâš kárvudâttâđ roolâhuáđđon ijge hutkâđ mainâsijd sätináálá já juátkiđ ovdâkááduin, ko rievtis tiätu nohá. Puigâ mainâseh vuáđuduveh rievtis tiätun.  Puigâ maainâs lii tot, mon sämmiliih halijdeh jyehiđ kuosijdis.