Stereotypia (stereotypia)

Stereotypia lii fastâ, oovtpiälálâš, almolistum já oovtkiärdánistum, maŋgii negatiivlâš já merettum oskomuš tiätu olmoošjuávhu tâi tiätu olmoošjuávkun kullee ovtâskâs ulmuu nobdum jiešvuođâin ton juávhu ovdâsteijen. Stereotypiai kevttim lii vyehi, main taheh sosiaallii maailm oovtkiärdánubbon, tastko toi vievâst njyelgejeh muuhijd já taheh oovtkiärdánin ibárdâs eres ulmuin. Stereotypiah aneh pyerrin já mučástâleh stereotypiaid ráhtám juávhu jiešvuođâid já uccáátteh nube, stereotyyppisii kuvvim čuosâttâhhân orroo juávhu nobdum jiešvuođâid. Sämmilâšvuođáin ávhástellee maađhâšmist tehálumosijd stereotypiaid kuleh sämimááccuh ađđiistâllee kopioh sehe ärbivuáváliih sämmiliih aassâmviäsuh. Sämimááccuhkopio kuhes kevttim sämmilâšvuođáin ávhástellee maađhâšmist lii muttám sämimááccuh sämimađhâšem synonyymin ađai vuáđunabdem miäldásii rekvisiittân tienuuvt, ete sämimááccuh kevttee ulmuuttáá iä ane mađhâšempyevtittâs veltihánnáá sämmilâžžân. Lasseen mađhâšemtooimâ hutkum ärbivuovijn, tego Laapi kaastâst, ulguupiälááh láá oovdânpuáhtám ucášeijee já vyeliárvusii kove sämmilijn kieppiis, tuolvâ já nijbijn hiäiloo oovtkiärdánis algâässen. Tággáár kove sämmilijn lii sehe luávkkájeijee já puástu já puáhtá oovdân ”sämmilâšvuođâ” sämikulttuurân vieres olgohäämist.