Eksotisistem (eksotisointi)

Ulguupiälái rähtim sämmilâškove maađhâšmist vuáđuduvá vieresvuotân ađai eksootlii ereslágánvuotân kukken orroo aassâmsojijdiskuin já ivnáás sämimááccuhijdiskuin. Eksotisistem peht ulmuuh, tiiŋgah já sajeh oovdânpuáhtojeh vieresin, kiäsutteijen já romantisistum häämist. Eksootlâžžân kovvejum čuosâttâh oovdâst vieresvuođâ, ereslágánvuotâ ađai spiekâst ”mist”,” normaalist”. Eksotiik já vieresvuođâ uuccâm lii lamaš mađhâšem motiivin jo ihečuođij ääigi. Veikkâ šiljoin tâi meecist sättih oinuđ láávuh, te ulmuuh ääsih tááluin. Sämimááccuh siste lii olmooš, ij uáinámuš ige eksootlâš rekvisiit.