Tiŋgâstittem (esineellistäminen)

Eromâšávt algâaalmugsiärváduvâid já tai jesânijd távjá tiŋgâstiteh mađhâšemuáinusin já sii kohtâleh tego sij liččii uási luándupirrâs uáinámušâin. Talle vájálditeh, ete sij láá ulmuuh, kiäi pááikán mađhâšeijeeh láá puáttám kyessin. Suomâst sämmilij tiŋgâstittem já eksotisistem maađhâšmist lii pištám iheluuvijd ulguupiälásij oovdânpyehtim puástutiädoid já puáris stereotypiaid vuáđuduvvee representaatioi tááhust. Mađhâšem positiivlâš vaiguttâsâid finniiččij uáinusân sämmiláid lohtâseijee rievtis tiäđu levâttem peht, mii tábáhtuvá kuldâlmáin sämmilij jieijâs jienâ já tuáivuid tast, maht sij jieš halijdiččii jieijâs čäittiđ já pyehtiđ uáinusân. Ovdâsvástádâslâš mađhâšeijee väljee ovdâsvástádâslâš já eettisávt kilelis sämipyevtittâs já -palvâlus.