Ovdâsvástádâslâš sämimađhâšem (vastuullinen saamelaismatkailu)

Ovdâsvástádâslâš já eettisávt kilelis mađhâšem kunnijât já áárvust sämikulttuur vuáđudeijee jiešvuovijd, oovded sämmilij já sämmilij päikkikuávlu pyereestvaijeem sehe taha máhđulâžžân sämikulttuur siäilum já ovdánem. Sämimaađhâšmist ovdâsvástádâslâšvuotâ lii konkreetlâš ovdâsvástádâs ton sämisiärváduv kuáttá, moos mađhâšem vaikuttâsah čyeccih tâi pyehtih čyecciđ. Sämimađhâšem nurkkekeđgin lii tot, ete sämikulttuur pyevtittâssân rähtim já oovdânpyehtim vuáđuduvá noonâ ohtâvuotân já ovdâsvástádâsân eidu ton sämisiärváduv sehe toi sämisuuvâi tâi siijdâi kuáttá, moi kulttuur tâi ärbivuáválávt assum kuávluid/navdâšemkuávluid mađhâšempyevtittâsâst kevttih tâi oovdânpyehtih. Ovdâsvástádâslâš, pyereest vaijee já eellimvuáimálâš mađhâšem váátá jieijâs vuáđđun pyereest vaijee já eellimvuáimálii kulttuur já kulttuurenâduv.