Ärbivuáváliih iäláttâsah (perinteiset elinkeinot)

Sämmilij ärbivuáválâš iäláttâssáid vuáđuduvvee eellimvyehi lii ain lamaš sorjolâš vijđes ärbikuávlui kevttimist kilelis vuovvijn. Sämmiláid já sii ärbivuáválâš iäláttâsâi háárjutmân eellimiähtu lii lamaš ain luándu kilelis kevttim, luándu já eennâm láá lamaš sämmilij eletteijeeh. Sämmilij ärbivuáválâš iäláttâsah láá puásuituálu, kyelipivdo, miäcástem, luándust finnee amnâsij nuurrâm, sämityeji já uceslágán eennâmtuálu sehe tai tááláá ääigi hárjuttem häämih. Ärbivuáválâš iäláttâsah láá sämikulttuur vuáđu.  Iäláttâsah tuálih paijeen sämikielâ, sämikulttuur, sämmilâs luándukoskâvuođâ já sämmilij ärbivuáválâš tiäđu sehe sirdeh taid suhâpuolvâst nuubán. Tiätuiäláttâsân já -kuávlun jiešvuođâlâš sämikielâ teermah sehe ärbivuáválâš tiätu láá iäláttâs hárjuttem peht aktiivlii kiävtust já tienuuvt siäilutteh kulttuur eellimvuáimálâžžân. Ärbivuáválâš sämi-iäláttâsâin puásuituálu tuáimá ain ohtân sämikulttuur tehálâš vuáđukeđgin já fáálá tehálâš kielâaareen lasseen amnâsijd ei. pihtâsáid, tuojijd já purrâmuškulttuurân.