Kulttuurlâš appropriaatio (kulttuurinen omiminen)

Kulttuurlâš appropriaatio rikkođ sämmilij kulttuurjiešhaldâšem ađai sämmilij vuáđulavâlii vuoigâdvuođâ meridiđ jieijâs kulttuurist já ton kiävtust. Kulttuurlâš appropriaatio uáivild taggaar tooimâ, mast ávhásteleh elementijguin nube kulttuurist, mii ij kulloo kevttee jieijâs kulttuurân, já ávhástâllâm tábáhtuvá kevttum kulttuur omâsteijei mietâmâšttáá. Kulttuurlii appropriaatiost lii koččâmuš ucceeblovo já eenâblovo koskâsijn väldiráhtusijn. Lovettes ávhástâllâm lasseen kulttuurlâš appropriaatio lii vaahâglâš tondiet, ko nube kulttuur elementijguin ávhástellee olmooš ij ibbeerd já/teikâ ana áárvust koččâmušâst orroo, ávhástâllâm čuosâttâhhân karttâm kulttuur tâi ávhástâllum elementij viijđásub kulttuurlâš merhâšume tâi saavâ. Maaŋgâi sämikulttuur elementijguin láá ávhástâllâm maađhâšmist jo iheluuvijd. Maŋgii maađhâšmist kevttum sämikulttuur symboleh láá sämmiláid uáli tergâdeh já toid kuleh maaŋgah merhâšittee kulttuurliih merhâšumeh já saavah, main kulttuur tubdâmettum ulmust ij máhđulávt lah jieŋâlub ibárdâs. Jis ij ibbeerd jieŋâlub kulttuurlii merhâšume, te tot puáhtá jođettiđ kulttuur puástukevttimân já máhđulávt punnjum kulttuurlii informaatio leevâtmân. Tietimettumvuotâ ij meddâlist kulttuur ulguupiäláá kevttee ovdâsvástádâs, peic čáittá eenâb-uv peerusthánnáávuođâ tâi áárvust anneem vänivuođâ ávhástâllum kulttuur kuáttá.