Disinformaatio já misinformaatio (disinformaatio ja misinformaatio)

Taan ääigi tiätutulveest puáhtá leđe hästee iäruttiđ rievtis tiäđu puástu tiäđust. Disinformaatioin tárgutteh tátulávt já tiäđulávt levâttum puástu tiäđu. Misinformaatio pelestis čuujoot puástu, vááijuvlâš teikkâ vahâgittee tiätun, mii lii adelum já levâttum epihuámmášuumeest teikkâ tietimettumvuođâ tiet. Sämmilijn tiettih uccáá. Ko váldá huámmášumán jo orroo almos tietimettumvuođâ sämmilij, sii historjá já kulttuur háárán, te dis- já misinformaatio lasseet ovdiist sämmiláid kyeskee vááijuvlii já puástu tiäđu já tuárju puástu vuovijd, moh vahâgiteh sämisiärváduv pyereestvaijeem já sämikulttuur siäilum eellimvuáimálâžžân, ellee dyynaamlâš kulttuurin. Lii meiddei pyeri tiäđuštiđ, ete puástu tiäđu já epipuuigâ kove čäittimáin puáhtá leđe ervidmettum vijđes vaiguttâs, mii kuáská Suomâst ässee sämmilij lasseen meiddei staatâ raajij rasta Ruotâ, Taažâ já Ruošâ peln ässee sämmilij kulttuurân já kulttuurlâš vuoigâdvuođáid. Ovdil ko puátá kolliđ sämmilij päikkikuávlun teikkâ Sáámán, te ovdâsvástádâslâš mađhâšeijee uápásmuvá sämmiláid já sii kulttuurân lyetittettee tiätukäldein.