Ellee kulttuurenâdâh (elävä kulttuurimaisema)

Ellee kulttuurenâdâh lii päikki, mast eellih aargâ já juhle. Taat kuáská eromâšávt algâaalmugáid, moid luándu já kulttuur kuleh čovgâdávt oohtân. Ellee kulttuurenâduv já tom puoh ässeid kalga kohtâliđ kunnijâtmáin, huámmášumán väldimáin já luodâid kyeđehánnáá. Ovdâsvástádâslâš mađhâšeijee máttá uáiniđ aašijd nube ulmuu keččâmčievâst já lättee tienuuvt tego tuáivuččij, ete ulmuuh lättejeh suu pääihist já ton aldapirrâsist. Sämmilij päikkikuávlust tun lah ain kiännii pääihist, jo-uv njuolgist ovdâšiljoost teikkâ “tyehišiljoost”. Veikkâ luándust ij ain lah uáinimnáálá čielgâ merkkâ tast, ete tobbeen ličij kiinii iällám, te sämmilij päikkikuávlust jyehi pääihist lii sämmiláid merhâšume, sämmilâš nommâ já monnii iveááigán čonnâsum kevttim. Mađhâšeijei “meccikuávlu” lii sämmilij päikki já maŋgâsáid meiddei ovdâspiergim já jiešráđálâš tálutuálu käldee eres ko mađhâšem peht.