Huámmášumán väldim (huomioiminen)

Ain ko mađhâšeijee vuálgá olgos jieijâs pääihist já eellimpirrâsist, te sun puátá kiännii nube pááikán já eellimpirrâsân. Pááikán, kost páihálâš ulmuuh eellih argâ já juhle.  Lii tehálâš anneeđ áárvust já kunnijâttiđ mätkičuosâttuv siärváduv já sii kulttuur. Ovdâsvástádâslâš mađhâšeijee ij toovâ páihálâšsiärváduv aargâst teikkâ juhleest eenâb hästee teikkâ torvottem, ko peri kunnijât já ana áárvust páihálâšsiärváduv já sii eellim já eellimpirrâs. Kunnijâttem já áárvust anneem lii pyeri oinuđ saanij já jurdui lasseen meiddei keevâtlâš tavoin ađai väldiđ huámmášumán páihálâšsiärváduv priivaatvuođâ sehe eellimvyevi já -tile táárbuid já háástuid. Ovdâsvástádâslâš mađhâšeijee ij tiŋgâstit páihálâšaalmug, pic mielâstubbooht kohtâl ulmuid olmožin, ij uáinámuššân. Ovdâsvástádâslâš mađhâšeijee máttá väldiđ huámmášumán mätkičuosâttuv pirrâs já aalmug uápásmuumáin ávus mieláin čuosâttâhân, kost áigu eelliđ.