Ávhástâllâm maađhâšmist (hyväksikäyttö matkailussa)
Sämmilâšvuođáin ávhástellee maađhâšmist sämisiärváduv ulguubeln puáttee mađhâšemiäláttâs hárjutteijeeh já eres mađhâšemtuáimeeh ávhásteleh sämikulttuurân lohtâseijee tâi čujotteijee elementijguin mađhâšempalvâlusâin olmâ ohtâvuođâttáá sämisiärvádâhân. Sämimááccuhist lii hirmâd stuorrâ merhâšume sämikulttuurist. Sämimááccuh kevttim asâttâleh čälimettum noormah, maid sämmiliih nuávditteh. Eromâšávt sämmilâšvuođáin ávhástellee maađhâšmist sämmilâšvuođâ pyevtittâssân rähtim já oovdânpyehtim lii maŋgii kuávdásmittum eidu sämimááccuhân tâi sämimááccuh hámásii mááccuhân, mon vievâst mađhâšempuohtust láá viggâm rähtiđ ”sämmilâš”, laš-uv koččâmuš talle mainâsijn tâi eres mađhâšempalvâlusâin. Sämimááccuhist lii-uv šoddâm sämimađhâšem vuosâsajasâš identiteet čäittee. Sämmilâšvuođáin ávhástellee maađhâšmist sämimááccuh kulttuurliih koodih já merhâšumeh láá kuittâg vájáldum tâi kuođđum huámmášumettáá já tast lii rahtum kuárus siäluttes roolipiivtâs. Sämimađhâšem eettisij ravvui váldu-ulmen lii sämmilâšvuođáin ávhástellee mađhâšem lopâttem sehe sämmiláid kyeskee mađhâšem peht levâneijee puástutiäđu meddâlistem.
Keejâ meid
sämmilâšvuođáin ávhástellee mađhâšem, sämmilâšvuotân vuáđuduvvee mađhâšem, ávhástâllâm historjá, sämimááccuh, epipuigâ, puigâvuotâ, kulttuurlâš identiteetsuáládem, kulttuurlâš appropriaatio, hutkum ärbivyevih, luávnejum ärbivyevih, stereotypia, primitivisistem, eksotisistem, zooifikaatio, tiŋgâstittem, rekvisiit