Homogenisistum (oohtânsuddâlum) (homogenisoituminen)

Kulttuurij homogenisistum lii uási kulttuurij globalisistumist, mii keeppid kulttuurij maaŋgâhámásâšvuođâ já rigesvuođâ. Mađhâšemráhtálâšvuođâst láá stuorrâ vaiguttemmáhđulâšvuođah já siämmást meid eromâš stuorrâ ovdâsvástádâs tast, maht čäittih já taheh kávpálâžžân kulttuurijd. Sämmilij päikkikuávlu lii riges já maaŋgâpiälálâš ellee sämikulttuur já kulttuurenâduv saje, kost páihálâšsiärváduvah eellih argâs já juhles. Mađhâšemráhtálâšvuotâ lii kuittâg ištâdâm kuávlun uđđâ mađhâšemtooimâid, moh láá jo-uv eres soojijn luávnejum teikkâ ollásávt keksejum, já ráhtám taid ain lasaneijee táárbu. Lasaneijee tárboin vuod vuáđusteh falâlduv táárbu. Luávnejum já keksejum ärbivyevih sättih jođettiđ homogenisistum mađhâšemčuosâttuv “identiteetân”, mon mađhâšem lii ráhtám, já talle arktâsâš kuávlu mađhâšemenâduvah älgih muštottiđ nubijdis kuávlu algâalgâlâškulttuurist já ton rigesvuođâ maaŋgânálásâšvuođâst peerusthánnáá. Kuávlun vieres “ärbivyevih” pyehtih máhđulávt meiddei toohâđ uhkevuálásâžžân algâalgâlâš kulttuur eellimvuáimálâšvuođâ, eromâšávt jis uđđâ hutkoseh já “ištâdmeh” láá noonâ ruossâlâšvuođâst kuávlu algâalgâlâš, ellee kulttuurenâdâhân kullee tobdos tavijguin. Kulttuurlâš homogenisistum loppâpuáđusin lii mađhâšeijeid purâttum siähálâškulttuur, mon sättih joba feilâlávt markkânistiđ kuávlun kullee kulttuurin. Rievtis tiäđu sirdem mađhâšem peht šadda váddásubbon teikkâ máhđulávt joba iästoo.