Kulttuurlâš killeelvuotâ (kulttuurinen kestävyys)

Tehálâš kulttuurlávt kilelis maađhâšmân lohtâseijee pyevtittâssân tohâmist lii noonâ ibárdâs kulttuurist, mii tahhoo pyevtittâssân. Kulttuurlâš pyevtittâssân toohâm kalga tábáhtuđ kulttuur haldâšeijei kulttuurlij áárvui já uáinui mield. Kulttuur haldâšeijeeh kalgeh pasteđ kontrollistiđ tom, maht sii kulttuur uáinoo maađhâšmist sehe maid oosijd kulttuurist puáhtá toohâđ pyevtittâssân já maid kalga kyeđđiđ kávpálâžžân toohâm ulguubel. Kulttuurlii killeelvuođâ teháliih jiešvuođah sämimaađhâšmist láá puigâvuotâ já kulttuur pyevtittâssân toohâm, mii vuáđuduvá páiháláid ärbivuovvijd já taavijd sehe tááláá ááigán. Kulttuurlii killeelvuođâ vuolgâsaje mađhâšem pyevtittâssân toohâm já oovdânpyehtim vuáváádijn já olášutdijn kalga leđe ávhástâllum kulttuur siäilum puáttee suhâpuolváid pyevtittâssân tohâmist tâi oovdânpyehtimist peerusthánnáá. Mađhâšemiäláttâs ij uážu tovâttiđ toimâidiskuin kulttuuräärbi hiäjusmem, uhkevuálásâžžân šoddâm tâi lappum. Sämikulttuur kávpálâš pyevtittâssân toohâm já toin ávhástâllâm kulá sämmiláid tuáimeid. Páihálii sämikulttuur kunnijâttem já puigâvuotâ kulttuuráin ávhástâlmist kuleh tehálii uássin kulttuurlávt kilelis já ovdâsvástádâslii sämimaađhâšmân. Kulttuurlávt kilelis mađhâšem meid taha máhđulâžžân tom, ete mađhâšemčuosâttuv sämisiärvádâh háárjut já sirdá kulttuuris sehe aargâst já juhleest nuuvt, ete maađhâšmist tâi mađhâšeijein iä šoodâ eenâb ko uccáá hemâdâsah tâi nubástusah kulttuurláid taavijd tâi vuovijd.