Ekonomâlâš killeelvuotâ (taloudellinen kestävyys)

Ekonomâlâš killeelvuotâ vuáju páihálij tálutuálui tuárjumân siärvádâh- já ohtâgâstääsist. Ekonomâlii killeelvuođâ vuolgâsaijeen lii, ete nuuvt stuorrâ uási mađhâšempuáđuin ko máhđulâš páácá čuosâttâhkuávlun. Taam puáhtá olášuttiđ tienuuvt, ete vääldih sämiaalmug jesânijd paargon sehe páihálii irâttâstooimâ vievâst. Ekonomâlii killeelvuotân kulá ovdâmerkkân aldapurrâmuš pivnohistem sehe sämmilij pyevtittâsâi, tego puigâ kietâtuojij já páihálij sämmilij palvâlusâi kevttim. Ekonomâlii killeelvuođâ ulmen lii mađhâšemiäláttâs lohtum sämisiärvádâhân tienuuvt, ete tast puáttee ekonomâlâš hiätu juáhás nuuvt vijđes kuávlun ko máhđulâš. Lii eromâš tehálâš, ete meid ollásávt mađhâšem ulguubeln orroo sämisiärvádâh ana mađhâšem positiivlâžžân já siärváduv hiäđutteijee toimân sehe vyeimiväärrin. Mađhâšem kalga meid tuárjuđ sämmilij ärbivuáválijd iäláttâsâid vâi puáhtá leđe ekonomâlávt killeel.