Sämimađhâšemmerkkâ

Ovdâsvástádâslii já eettisávt kilelis sämimađhâšem sertifikaat lii sämisiärváduv haldâšem já mieđettem virgálâš tubdâstâs sämimađhâšemtuáimei, mii tiävdá ovdâsvástádâslii já eettisávt kilelis sämimađhâšem várás ovdedum kriterij vátámâšâid. Sertifikaat čáittá, ete toimâ lii sämmilij jieijâs tuhhiittem, kunnijât sämikulttuur já -ärbivyevi sehe tuárju kulttuurlii, sosiaallii, ekonomâlii já ekologâlii killeelvuođâ já kyeddimnaavcâ.

Sertifikaat finnim váátá:

• págulij vuáđukriterij tevdim (haaldâtliih, sosiaalliih, kulttuurliih, ekologâliih, ekonomâliih já ovdâsvástádâslii viestâdem uásisyergih),
• irâttâs tooimâ mield spesiaal- já valjimiävtulij kriterij čođâldittem (purrâmuš- já/tâi puásuimađhâšem, vyeliskappum já/tâi pargovievâ oleslâš uápásmittem)
• sertifikaat kriterijguin luámádâs, irâttâs jieijâs Sämimađhâšem ellee kulttuurenâduv vuávám (SMEKS) rähtim, mast identifisistojeh tooimâ vaikuttâsah luándun, kulttuurân já páihálâšsiärvádâhân sehe heiviittuvvoo toimâ toi killeelvuođâi já kyeddimnaavcâi mield.

Sertifikaat tuáimá:

• puigâvuođâ já sämikulttuur tuođâlii kunnijâttem čäitten sehe páihálâšsiärváduvâi já ellee kulttuurenâduv argâpeeivi já juhle tuođâšteijee aicâdeijen já vuotânvälden,
• lyetittetteevuođâ já kvaliteet symbolin mađhâšeijeid, mađhâšemsuárgán já oovtâstpargokuoimijd,
• stivrimniävvun irâttâssáid, moh halijdeh ovdediđ jieijâs tooimâ ovdâsvástádâslávt.