Ovdâsvástádâslâšvuotâ

Ovdâsvástádâslâš já eettisávt kilelis mađhâšem kunnijât já ana áárvust sämikulttuur vuáđusteijee jiešvuođâid, oovded sämmilij já sämmilij päikkikuávlu pyereestvaijeem sehe taha máhđulâžžân sämikulttuur siäilum já ovdánem.

Sämimaađhâšmist ovdâsvástádâslâšvuotâ lii konkreetlâš ovdâsvástádâs ton sämisiärváduv kuáttá, moos mađhâšem vaikuttâsah čyeccih tâi pyehtih čyecciđ. Sämimađhâšem vuáđđun lii tot, ete sämikulttuur pyevtittâssân toohâm já oovdânpyehtim vuáđuduveh noonâ ohtâvuotân já ovdâsvástádâsân ton sämisiärváduv sehe tai sämisuuvâi já siijdâi kuáttá, kiäi kulttuur, ärbivuáválávt assum kuávluid tâi navdâšemkuávluid sii kevttih já oovdânpyehtih mađhâšempyevtittâsâst. Ovdâsvástádâslâš, pyereest vaijee já eellimvuáimálâš mađhâšem váátá jieijâs vuáđđun pyereest vaijee já eellimvuáimálii kulttuur já kulttuurenâduv.

Taan ohtâvuođâst ovdâsvástádâslâšvuotâ uáivild tiäđulii já eettisávt kilelis mađhâšemtooimâ, mast viggeh toohâđ kilelijd já vuoigâlijd čuávdusijd, väldiđ vuotân tavoi já miärádâsâi vaikuttâsâid ulmuid, pirrâsân já siärvádâhân sehe kyeddiđ ovdâsvástádâs čuávumušâin. Irâttâssáid tot meerhâš huolâttem páihálâšsiärváduvâst, pirrâsist, ulmuin, čonâsjuávhuin já eettisávt kilelis finnodâhtooimâst. Ovtâskâs ulmuid tot lii jiešiävtulâš ovdâsvástádâs jieijâs tavoi vaikuttâsâin iärásáid já pirrâsân. Ovdâsvástádâslâšvuotâ lii meid positiivlij vaikuttâsâi nanodem.

Ovdâsvástádâslâš sämimađhâšem lii mađhâšem, mii lii sämisiärváduv tuhhiittem já ton miärádâsvááldán vuáđuduvvee. Tot kunnijât sämikulttuur já -äärbi, tuárju siärváduv pyereestvaijeem já torvee luándu maaŋgâhámásâšvuođâ.

Ovdâsvástádâslâšvuotâ taan ohtâvuođâst uáivild:

• kulttuurlii killeelvuođâ:

mađhâšem ij uážu puunnjâđ sämikulttuur tâi -tiäđulâšvuođâ, peic tot kalga vuáđuduđ ko. kulttuur haldâšeijei jieijâs jienân já tiätun; sämikulttuur ovdâsvástádâslâš kevttim maađhâšmist já kávpálâžžân toohâm kulá sämmilij kulttuurjiešhaaldâšmân.

• sosiaallii killeelvuođâ:

mađhâšem lii haldâšum já tot tuárju ei. páihálâšsiärváduv pyereestvaijeem já uásálistittem sehe naanood nuorâi máhđulâšvuođâid juátkiđ ärbivuáválijd iäláttâsâid,

• ekologâlii killeelvuođâ:

toimâ vuávájuvvoo tienuuvt, ete tot ij hiäjusmit om. kuáttumkuávlui, čácáduvâi já ekosysteemij killeelvuođâ já kyeddimnaavcâ,

• ekonomâlii killeelvuođâ:

mađhâšem hiäđuh čujottuvvojeh páihálâšsiärvádâhân, ovdâmerkkân addelmáin pargo já skappuumáin aldapurrâmuš páihálijn tuáimein, kiäh tuáimih ovdâsvástádâslávt já eettisávt kilelis vuovvijn.

Ovdâsvástádâslâšvuotâ lii prinsiip, mii vaaikut čoođâ sämimađhâšem sertifikaat.