Sámemátkeealáhusa sertifikáhta

Vásttolaš ja ehtalaččat suvdilis sámemátkeealáhusa sertifikáhta lea sámeservoša hálddašan ja mieđihan virggálaš dovddastus sámemátkeealáhusdoaibmái, mii deavdá vásttolaš ja ehtalaččat suvdilis sámemátkeealáhusa várás ovddiduvvon kritearajoavkku gáibádusaid. Sertifikáhta čájeha, ahte sámit leat ieža dohkkehan doaimma, dat atná árvvus sámekultuvrra ja -árbbi ja maid doarju kultuvrralaš, sosiálalaš, ekonomalaš ja ekologalaš suvdilvuođa ja guoddinnávcca.

Sertifikáhta oažžuma eaktun leat:

• bákkolaš vuođđokritearaid dievvan (hálddahuslaš, sosiálalaš, kultuvrralaš, ekologalaš, ekonomalaš ja vásttolaš gulahallama oassesuorggit),
• fitnodaga doaimma luonddu mielde sierra- ja válljenvuloš kritearaid čađaheapmi (borramuš- ja/dahje boazomátkeealáhus; vuolleháhkan ja/dahje bargiid oppalaš oahpásmuhttin)
• sertifikáhta kritearajoavkkuin ovttastuvvi, fitnodaga iežas Sámemátkeealáhusa ealli kulturduovdaga plána (SMEKS) ráhkadeapmi, mas dovdojuvvo doaimma váikkuhusat lundui, kultuvrii ja báikkálašservošii ja maid heivehuvvo doaibma daid suvdilvuođaid ja guoddinnávccaid mielde.

Sertifikáhta doaibmá:

• eaktivuođa ja sámekultuvrra oppalaš gudnejahttima duođašteaddjin ja báikkálašservošiid ja ealli kulturduovdaga árgga ja ávvudeami duođašteaddji áicin ja vuhtiiváldin,
• luohtehahttivuođa ja kvalitehta symbolan mátkkálaččaide, mátkeealáhussuorgái ja ovttasbargoguimmiide,
• bagadanreaidun fitnodagaide, mat háliidit ovddidit iežaset doaimma vásttolaččat.