Árbevirolaš ealáhusat (perinteiset elinkeinot)

Sápmelaččaid árbevirolaš ealáhusaide vuođđuduvvi eallinvuogit leat álo leamaš sorjavaččat viiddes árbevirolaš guovlluid geavahusas suvdilis vugiin. Sápmelaččaide ja sin árbevirolaš ealáhusaid ollašuhttimii lea leamaš eallineaktun áiggiid čađa luonddu suvdilis geavaheapmi, luondu ja eana leat leamaš sápmelaččaid ealiheaddjit. Sápmelaččaid árbevirolaš ealáhusat leat guollebivdu, boazodoallu, meahccebivdu, luonddubuktagiid čoaggin ja sápmelaš giehtaduodji ja vel unnahámát eanadoallu ja daid dáláš ollašuhttinvuogit. Árbevirolaš ealáhusat leat sámekultuvrra vuođđu. Ealáhusat bajásdollet sámegiela; sámekultuvrra, sápmelaš luondogaskavuođa ja sápmelaččaid árbevirolaš dieđu ja sirdet daid sohkabuolvvas nubbái. Dihto ealáhussii ja guvlui mihtilmas sámegiela terminologiija ja árbevirolaš diehtu leat ealáhusa bokte aktiivvalaš geavahusas ja seailluhit kultuvrra eallinfámolažžan. Árbevirolaš sámeealáhusain boazodoallu doaibmá ainge dehálaš sámekultuvrra čiehkageađgin ja fállá dehálaš giellaarena lassin materiálaid ee. biktasiidda, dujiide ja borramuškultuvrii.