Boazu (poro)

Boazu (Rangifer tarandus tarandus) lea beallelojes ealgaealli, mii  buolvaduvvá duottargottis. Boazu ja dan fuolki, vuovdegoddi (Rangifer tarandus fennicus), spiehkkasit eará ealgaealliin dan láhkai, ahte sihke njiŋŋálasain ja varrásiin leat čoarvvit. Bohccuid namahusat molsašuddet daid ivnni, agi, sohkabeali ja máŋggaid eará iešvuođaid mielde. Njiŋŋálas boazu gohčoduvvo áldun ja varris boazu sarvvisin. Sarvvis gahčaha čorvviidis ragatáigge maŋŋá čakčat. Spáillihat ja hearggit elege gálddahat maŋŋelabbos ja álddut guottetáigge maŋŋá elege go leat guoddán misiid miesse-geassemánus sámiid ruovttuguovllus. Boazu lea vuogáiduvvan erenomážit árktalaš eallindiliide. Bohccot leat priváhtaopmodat. Vaikke sámiid ruovttuguovllus bohccot guhtot friija, bohccos lea álot eaiggát. Boazooamastus merkejuvvo bohcco bealljái bealljemearkkain. Eará láhkai go Norggas ja Ruoŧas, boazodoallu Suomas ealáhussan ii gula dušše sámiide. Suomas boazodoalloláhka gieldá bohccuid gavdnjema dehe ráfehuhttima. Eandalitge giđđadálvi ja giđđa leat rašes áiggit boazodoalu dáfus daningo álddut leat čoavjjehat.