Kultuvrralaš oamasteapmi (kulttuurinen omiminen)

Kultuvrralaš oamasteapmi rihkku sámiid kulturiešráđđema, nuppiid sániiguin sámiid vuođđolágalaš vuoigatvuođa mearridit iežaset kultuvrras ja dan geavaheamis. Kultuvrralaš oamastemiin dárkkuhuvvo dakkár doaibma, mas ávkin adnojuvvojit elemeanttat nuppi kultuvrras, mii ii gula geavaheaddji iežas kultuvrii, ja ávkin atnin dáhpáhuvvá almmá geavahuvvon kultuvrra oamasteaddjiid miehtama haga. Kultuvrralaš oamasteamis lea jearaldat unnitlogu ja eanetlogu gaskasaš válderáhkadusain. Lobihis ávkin atnima lassin kultuvrra oamasteami dahká vahátlažžan dat, ahte dakkár olmmoš, guhte atná ávkin nuppi kultuvrra elemeanttaid, ii ádde dahje ane árvvus elemeanttaid viidásut kultuvrralaš mearkkašumi dahje dieđu. Olu sámekultuvrra oasit leat buorringeavahuvvon turismmas juo logiidjagiid. Dávjá turismmas geavahuvvon sámekultuvrra symbolat leat sámiide erenomáš dehálaččat ja daidda laktásit máŋggat mearkkašahtti kultuvrralaš mearkkašumit ja dieđut, maid birra dakkár olbmos, guhte ii dovdda kultuvrra, ii vejolaččat gávdno čiekŋalut ipmárdus iige áddejupmi. Čiekŋalut kultuvrralaš mearkkašumi áddetmeahttunvuohta ovddida kultuvrra boasttogeavahusaid ja vejolaččat dagaha kultuvrralaš boastto informašuvnna lávdama. Diehtemeahttunvuohta ii jávkat kultuvrra olggobeale geavaheaddji ovddasvástádusa, muhto dovddaha buorebutge skiluhisvuođa dahje badjelgeahččama kultuvrra ektui, maid geavaha ávkin.