Disinformašuvdna ja misinformašuvdna (disinformaatio ja misinformaatio)

Dálá áiggi diehtodulvvis sáhttá leat hástaleaddji earuhit eakti dieđu boasttu dieđus. Disinfromašuvnnain dárkkuhit boasttu dieđu, mii lea lávdaduvvon eaktodáhtolaččat ja diđolaččat. Misinformašuvdna fas čujuha fuomáškeahttá dahje diehtemeahttunvuođas addojuvvon ja lávdaduvvon boasttu, váilevaš ja vahátlaš dihtui. Sápmelaččaid birra diehtit unnán. Go vuhtiiváldá almmolaš diehtemeahttunvuođa, mii gávdno ja guoská sápmelaččaid, sin historjjá ja kultuvrra, dis- ja misinformašuvdna lasihit ovddežis sápmelaččaid guoski váilevaš ja boasttu dieđu ja doarju vahátlaš geavadagaid, mat vahágahttet sámeservoša buresveadjima ja sámekultuvrra seailuma eallinfámolažžan, eleš dynámalaš kultuvran. Lea maiddái buorre fuobmát, ahte boasttu dieđu ja eahpeeakti gova ovdanbuktimis sáhttet leat árvitmeahttun viiddes váikkuhusat, mat gusket Suomas ássi sápmelaččaid lassin maiddái stáhta rájaid badjel Ruoŧa, Norgga ja Ruošša bealde ássi sápmelaččaid kultuvrra ja kultuvrralaš vuoigatvuođaid. Ovdal sápmelaččaid ruovttuguovllus galledeami, vásttolaš turista oahpásmuvvá sápmelaččaide ja sin kultuvrii luohtehahtti diehtogálduid bokte.