Heterogenalašvuohta (heterogeenisyys)

Sámekultuvra ii leat dušše boazu, gákti ja lávvu, vuoikko turismaindustriija dávjá addáge dakkár gova. Ii leat dušše okta vuohki čájehit sámevuođa ja sámekultuvrra. Boazu, gákti ja lávvu ovddastit dušše oasi máŋggalágan sámekultuvrra albmananhámiin. Sámekultuvra lea heterogenalaš dahjege máŋggahámat, girjái, rikkis, áigái ja báikái ja gustovaš diliide vuogáiduvvi eallinvuohki, masa váikkuhit hui ollu birrasa ealli kulturduovdda ja dan suvdilis ávkin atnin. Ovdamearkan sámegiella, muitalusat, musihkka ja sámekultuvrra oinnolamos symbolat dego gávttit ja sámeduojit leat nana oktavuođas ee. árbevirolaš sámeealáhusaide ja hábmejit earutkeahtes ollisvuođa, man juohke oassesuorgi dárbbaša nuppi vai dat seailu eallinfámolažžan ja dahká vejolažžan sámekultuvrra seailuma, ovdáneami ja sirdašuvvama boahttevaš sohkabuolvvaide. Jos ovdamearkka dihte okta kultuvrra oassesuorgi jávká dahje dan doaibmaguovlu rádjašuvvá, dovdojit dát váikkuhusat dalán earáin.