Doaibmaguovlu

Doaibmaguovlu oaivvilda eatnandieđalaš dahje doaimmalaš guovllu, mas organisašuvdna, fitnodat, servodat dahje ovttaskas doaibmi bargá doaimmainis. Guvlui sáhttá gullat sihke aitosaš buvttadan- ja bálvalanbáikkit ja dat birrasat, maidda doaimma váikkuhusat ollet.

Vásttolaš ja ehtalaččat suvdilis sámemátkeealáhusas doaibmaguvlui gullet dat báikkit ja duovdagat, main mátkeealáhusdoaibma plánejuvvo, ollašuhttojuvvo ja márkanastojuvvo. Doaibmaguovllu meroštallamis galgá vuhtiiváldit:

• luonddubirrasa: ovdamearkan guohtunguovlluid, guollebivdo- ja meahccebivdoeatnamiid ja eará árbevirolaš geavahanguovlluid, nu maiddái dain ealli ealliid ja lottiid, šattuid ja čázádagaid ja maid báikkálaš doaibmiid, dego ruovttudárbbu deavdi olbmuid.
• kulturárbbi ja servoša: ovdamearkan bassi báikkiid, kulturdáhpáhusaid ja árbevirolaš ealáhusaid guovlluid ja maid vuoiŋŋalaš ja symbolalaš mearkkašumiid, dego muitalusaide, máidnasiidda ja árbevieruide gullevaš báikkiid.
• eatnandieđalaš ja hálddahuslaš rájáid: ovdamearkan sámiid ruovttuguovllu, bálgosiid ja gielddaid, maid guovllus doaibma lea.

Doaibmaguovllu earuheapmi ja govven (omd. SMEKS-plánas) lea dehálaš, vai mátkeealáhusdoaimma sáhttá heivehit oktii báikkálaš suvdilvuođain ja guoddinnávccain, árbevirolaš ealáhusaiguin ja kultuvrralaš árvvuiguin. Doaibmaguovllu earuheapmi veahkeha ovddalgihtii eastadit ruossalasvuođaid ja nannet servoša luohttámuša doaibmái.

Doaibmaguvlui laktása alo maiddái doaimma váikkuhusaid ollilvuohta: mátkeealáhusa ekologalaš, sosiálalaš, ekonomalaš ja kultuvrralaš váikkuhusat sáhttet čuohcat viidásabbotgo aitosaš doaimma sadjái. Danin doaibmaguovllu meroštallan gáibida sihke fysalaš rájáid ja maiddái kultuvrralaš mearkkašumiid dovdama ovttas báikkálaččaiguin.