Kuállejeijeeravvuuh

Kuállejeijeeravvuuh láá viestâdemvyehi, mon vievâst kuállejeijeeh uápistuvvojeh toimâđ ovdâsvástádâslávt já torvolávt pääihist, kost sij kuállejeh já kunnijâttiđ já väldiđ huámmášumán páihálâšsiärváduv, pirrâs já kulttuur. Ton ulmen lii tuárjuđ kilelis mađhâšem, suojâliđ páihálii luándu já kulttuuräärbi sehe visásmittiđ positiivlii vuáruvaikuttâs kuállejeijei já páihálii siärváduv kooskâ. Ravvuuh išedeh mađhâšeijeid iberdiđ páihálijd áárvuid já vuáháduvâid, mii taha kolliimist njyebžilub, jieŋâlub já merhâšitteb puoh uásipeelijd.

Sämitige Ovdâsvástádâslii mađhâšeijee kuállejeijeeravvuuh miäldusmaterialijguin vuáđuduveh Sämitige tuhhiittem sämimađhâšem eettisáid ravvuid. Sunna Kiti koveh čielgâsmiteh eettisij ravvui viestâ tast, maht puáhtá toimâđ, vâi puátteevuotâ ličij kulttuurtorvolub, ovdâsvástádâslub já eettisávt kilelub sämmilij päikkikuávlust. Ravvuuh meid tuárjuh sämikulttuur paijeentoollâm jotkuuvâšvuođâ.  Sämitige vyesimáánust 2022 almostittem kuállejeijeeravvui olesvuotâ lii raavâ- já tiätupakkeet mađhâšeijeid, mon sämisiärvádâh lii jieš sannim já tuhhiittâm Sämitige tuhhiittem, siärváduvâi uásálistittem já kullum mainâsij peht. Tot muštâl, maht kalga toimâđ kulttuurlávt, sosiaallávt já pirâslávt kilelis vuovvijn sämmilij päikkikuávlust. Ravvuuh aneh sistees sehe konkreetlijd toimâmravvuid já tuávááštiäđuid tast, maht kunnijâttiđ já väldiđ huámmášumán sämmilii kulttuur, ärbivuáválijd iäláttâsâid, pase soojijd, luándu já páihálâšsiärváduv ráávhu.

Kuállejeijeeravvuuh vuáđuduveh kulttuur haldâšeijei jieijâs uáinuid – ij ulguupiälásáid ibárdâssáid – já toi ulmen lii visásmittiđ, ete mađhâšeijei toimâ tuárju páihálii pyereestvaijeem ige toovât hááitu.