Borramušmátkeealáhus

Vásttolaš borramušmátkeealáhus ovttastahttá borramušvásáhusaid ja borramuškultuvrra vásttolaš ja ehtalaččat suvdilis sámemátkeealáhusa prinsihpaide: birrasa gudnejahttimii ja vuhtiiváldimii, sosiálalaš, kultuvrralaš, ekologalaš ja ekonomalaš vásttolašvuhtii, suvdilvuhtii ja guoddinnákcii. Mihttomearrin lea fitnet mátkeealáhusa negatiivvalaš váikkuhusaid dálkkádahkii ja lundui nu unnin go vejolaš ja maid doarjut guovllu servošiid ja ealáhusaid earret eará dan láhkai, ahte adnojuvvo ávkin lagasborramuš.

Sámiid ruovttuguovllus borramušmátkeealáhus čatnasa nannosit árbevirolaš ealáhusaide ja luondduaddámušaid ávkinatnimii váttolaš ja ehtalaččat suvdilis vugiin. Borramušmátkeealáhusa buktagat sáhttet leat ovdamearkan bohccobirgui, guollái, fuđđui, murjjiide ja urttaide vuođđuduvvi mállásat ja daidda gullevaš málestan- ja seailluhanárbevierut.

Vásttolaš ja ehtalaččat suvdilis sápmelaš borramušmátkeealáhusa eaktun lea, ahte:

• doaibma lea ávkin maiddái báikkálašservošii ja nanne kultuvrra eallinfámu (omd. vásttolaš ja ehtalaččat suvdilis vuolleskáhppoma bokte).
• muitalusa huksen borramušas ja kultuvrras dáhpáhuvvá sámiid iežaset eavttuid mielde, bonjakeahttá boasttoláganin árbevieruid.
• searvvuš dohkkeha buktagiid ja muitalusaid ovdanbuktima.
• vuođđoávdnasiid álgovuođu sáhttá vuohttit ja dat leat buvttaduvvon dahje háhkkojuvvon vásttolaš ja ehtalaččat suvdilis vugiin.

Visit Finland Kestävä ruokamatkailuopas (Suvdilis borramušmátkeealáhusa rávagirji (2024) mielde borramušmátkeealáhus oaivvilda mátkeealáhusa, mas guovddáš motiivan lea borramuš ja dasa gullevaš vásáhusat. Mátkkálaš ohcá báikkálaš smáhkaid, vuođđoávdnasiid, málestanvieruid ja borramuškultuvrra, maid bokte sirdašuvvá báikki autenttalaš dovddut. Borramušmátkeealáhussii sáhttá gullat ovdamearkan restoráŋŋa- ja ruoktoboradeapmi, gáhttaborramuš, borramušfestiválat, toarggain galledeamit, borramušgeinnodagat, smávva vuollabijahagain ja destillerenbáikkiin galledeamit, luondduaddámušaide laktáseaddji tuvrrat (murjen, guopparčoaggin, guollebivdu), ja maid bagadallon málesteapmi ja borramušvásáhusat muitalusaiguin.

Borramušmátkeealáhusa geasuhussan leat erenomážit:

• Báikkálašvuohta ja sesoŋŋa
  • eakti vuođđoávdnasat, jagiáiggi ritma
• Muitalusat ja kultuvra
  • borramuša duogážat, árbevierut ja historjá
• Buhtisvuohta ja vásttolašvuohta
  • ekologalaš vuođđoávdnasat, suvdilis válljejumit
• Vásáhuslašvuohta ja oassálastinvejolašvuohta
  • mátkkálaš beassá ieš iskat, oahppat ja oassálastit