Mađhâšem kyeddimnavccáin (matkailun kantokyky)

Mađhâšem kyeddimnavccáin čujotteh maksimaallii miärán mađhâšeijeid já/tâi mađhâšemtooimâid, mon tiätu kuávlu já/tâi siärvádâh tiätuääigi pasta vuástáväldiđ ain häävild nuuvt, ete tast ij šoodâ eenâb ko uccáá vaahâg fyysisii, sosiaallii, kulttuurlii tâi ekonomâlii pirrâsân tâi ete mađhâšeijei äššigâstuđâvâšvuotâ ij vuállán tuhhiittettee rääji vuálá. Mađhâšem kyeddimnavccáin merideh te maađhâšmist šaddee nubástusâi raajijd, moh láá tuhhiittettee páihálávt já ääigi háárán. Nubenáál ettum, ko mađhâšem kyeddimnahcâ ij pijssáá te maađhâšmist šaddee nubástusah páihálii sämisiärvádâhân, -kulttuurân, pirrâsân já/tâi haddetáásán iä lah innig páihálávt tuhhiittetteeh. Tondiet lii-uv eromâš tehálâš, ete mađhâšem vaikuttâsâi árvuštâllâm tahhoo merikoskâsávt. Kyeddimnaavcâ árvuštâldijn kalga kuullâđ meid páihálii sämisiärváduv jienâ. Mađhâšem kyeddimnahcâ lii te ain čonnum tiätu sajan já ááigán já tot iälá juátkojeijee nubástusâst sehe sáttá heiviittâllâđ ennuv joba uccâ kuávlu siste. Ko tiätu kuávlust jukseh maađhâšmân lohtâseijee kyeddimnaavcâ ađai toleransrääji, uáivild tot tom, ete mađhâšem negatiivliih vaikuttâsah láá miärálávt eenâb ko positiivliih vaikuttâsah. Sämimaađhâšmist kolgâččii vuosâsaajeest leđe positiivliih vaikuttâsah sehe sämisiärvádâhân ete ton siäilumân, oovdedmân já sirdemân puáttee suhâpuolváid. Ko mađhâšemiäláttâs ain vijđán já šadda sehe mađhâšeijeemereh lasaneh kalga mađhâšem kyeddimnahcân kiddiđ eromâš huámmášume. Páihálii sämiaalmug jieijâs suogârdâllâm jieijâs luánduriggoduvâi kevttimmáhđulâšvuođâi hiäjusmist ko verdid mađhâšeijei luánduriggoduvâi kevttimân huáput toleransraajij juksâm já/tâi paijeel moonnâm. Ko suogârdâleh kyeddimnaavcâ já meid kyeddimnaavcâ raajijd, kalga-uv vuosâsaajeest turviđ čuosâttuv páihálii sämiaalmug pyereestvaijeem já tuđâvâšvuođâ vájáldithánnáá kuávlu kiäsutteijeevuođâ já mađhâšemveeltâi siäilum. Ko mađhâšem negatiivliih vaikuttâsah annojeh stuárráábin ko positiivliih, älgih páihálij ulmui negatiivliih tubdâmušah já jurduuh jotelávt spejâlistiđ lattiimân mađhâšeijei kuáttá já ton peht njuolgist mađhâšeijeetutâvâšvuotân. Tondiet mađhâšem kyeddimnaavcâ merikoskâsâš árvuštâllâm sehe kyeddimnaavcâ paijeel monâmân jođettem suujâi tivvoom lii sehe sämisiärváduv ete mađhâšemsyergi ohtsâš hiätu.