Äuʹǩǩenâânnmõš turiismâst

Sääʹmvuõđ äuʹǩǩenõõʹnni maatkčummšest sääʹmõutstõõzz åålǥpeäʹlnn pueʹtti maatkčemjieʹllemvueʹjj harjjteei da jeeʹres maatkčemtoiʹmmjeei äuʹǩǩee da âʹnne äuʹǩǩen sääʹmkulttuuʹre õhttneei leʹbe čuäʹjteei elemeeʹntid maatkčemkääzzkõõzzin õhttvuõđtää sääʹmõutstõʹsse. Sääʹmpihttsin lij samai jõnn miârktõs sääʹmkulttuurâst. Sääʹmpihttsi âânnmõõžžâst lie ǩeeʹrjteǩani vuâkkõõzz, koid säʹmmla jääʹǩǩte. Jeäʹrben sääʹmvuõđ äuʹǩǩenõõʹnni maatkčummšest sääʹmvuõđ ouddsen tuejjummuš da ouʹdde pohttmõš kuâsttje täujja sääʹmpihttsen leʹbe sääʹmpihttsinallšem pihttsen, kooi veäkka maatkčemouddsest leät põrggâm tuejjeed ”sääʹm”, leäǥǥas kõõččmõš mainnsin leʹbe jeeʹres maatkčemkääzzkõõzzin. Sääʹmpihttsest lij šõddâm sääʹm-maatkčummuž vuõss-sâjjsaž identiteeʹtt ouʹdde puʹhtti. Sääʹmvuõđ äuʹǩǩenõõʹnni maatkčummšest sääʹmpihttsi seʹst ââʹnnem kulttuurlaž koodid da miârktõõzzid leät kuuitâǥ väjldâttam leʹbe kuâđđam lokku vääʹldǩani da tõin leät tuejjääm kuâras roolpihttsid siõltää. Sääʹmturiism eettlaž vuäppõõzz väʹlddtäävtõssân lij jaukkeed sääʹmvuõđ äuʹǩǩenõõʹnni maatkčummuž di maatkčummuž pääiʹǩ säʹmmlaid kuõskki puäst-teâđ liâvvnummuž.