Tuõđlažvuõtt (aitous)

Vasttõsvuõđlaž alggmeerturiismâst tuõđlažvuõđ meäʹrtõõllmõš miârkkšââvv alggmeer vuäinnmõõžž tuõđlažvuõđâst da tõʹst, mâiʹd da mõõnn nalla jiiʹjjes kulttuur haaʹleet čuäjtõõllâd, äuʹǩǩeed da kaauplâʹstted. Tät vuäinnmõš ij pâi vaʹstted tõn, måkkmen turistt jordd alggmeer. Sääʹmvuõʹtte vuâđđõõvvi turiismâst tuõđlažvuõtt vuâlgg jiiʹjjes vuäinnmõõžžâst da jiâllum jieʹllmest, aarǥâst da juuʹhlest jiiʹjjes jieʹlli kulttuurkueʹstelm seʹst. Tuõtt jieʹllmest da tõn pirr mainsteʹmen ij taarbâž teâvõõttâd roolhäämman ij-ka roʹttjed mainnsid (feikk)haattâst da juäʹtǩǩed jorddmõõžživuiʹm, viggmõõžživuiʹm leʹbe hoʹhssjed mainnsid teâđ puuđeen. Tuõtt mainnâz vuâđđâʹvve tuõđlaž tiõttu. Tuõđlaž maainâs lij tõt, koonn säʹmmla haaʹlee jueʹǩǩed kuõʹsseez.