Alggmeerturismm (alkuperäiskansamatkailu)

Vasttõsvuõđlaž alggmeerturismm vuâđđââvv obbvääldlaž ǩeâllʼjemvuõđi da kueʹddemvuõđ lokku väʹlddma da čõõđ viikkma pääiklaž tääʹzzest kå. alggmeer aazztem vuuʹdin. Alggmeerast âlgg leeʹd vueiʹttemvuõtt kontrollâʹstted tõn nääʹl da peäggtummuž, mõõnn nalla siʹjji kulttuur čuäʹjtet da äuʹǩǩeet kaauplânji turiismâst. Alggmeer jiõčč rääjj aunnsen da pohtt õuʹdde jiiʹjjes kulttuur jiiʹjjes õutstõõzz piijjâm raaji seʹst. Kulttuur vaaldšeeiõutstõs âlgg aktiivlânji da kulttuurstaanlânji pâʹstted vaaikted kulttuurâs kuâsttjemvuõʹtte da ouddsen raajjmõʹšše, nuʹtt što turiismâst lie positiivlaž vaaiktõõzz sij kulttuur tuõʹllʼjummša da serddmõʹšše pueʹtti puõlvvõõǥǥid. Nääiʹt alggmeerturismm ij leäkku tõt, što jeärraz ko alggmeer vuäzzla jueʹǩǩe teâđ alggmeerain. Tõn sâjja alggmeerturismm lij tõt, ko alggmeer jiijj čuäʹjtâʹlle jiiʹjjes kulttuur jiiʹjjes määinaivuiʹm. Turiist vasttõsvuõtt da vaaiktemvueiʹttemvuõđ koʹlle vasttõsvuõđlai da eettlânji ǩeâllʼjeei alggmeer kääzzkõõzzi da -ouddsi âânnmõʹšše.