Lokku välddmõš

Pâi ko turistt vuâlgg jiiʹjjes pääiʹǩest da jieʹllempirrõõzzâst, puätt son ǩeän-ne nuuʹbb päikka da jieʹllempirrõʹsse. Päikka, koʹst pääiklai argg da juʹhll šâʹdde. Pueʹrr lij äärvast ââʹnned da ciʹsttjed mäʹtǩǩpääiʹǩ vuâsttavaʹlddi õutstõõzz da siʹjji kulttuur. Vasttõsvuõđlaž turistt ij tueʹjjed pääiklažõutstõõzz aarǥâst leʹbe juuʹhlest väʹǯǯlab leʹbe staanteʹmesvuõđlab peʹce âânn ciistâst da äärvast pääiklažoummuid da siʹjji jieʹllem da jieʹllempirrõõzz. Ciʹsttjummuž da äärvast âânnmõõžž lij pueʹrr kuâsttjed saaʹni da jurddji lââʹssen še tuejjeem tääʹzzest kååʹtt miârkkšââvv pääiklažoummui privattvuõđ lokku välddmõõžž di jieʹllemnääʹl da -sââʹj taarbid da vaʹǯǯtõõzzid. Vasttõsvuõđlaž turistt ij ââʹn käuʹnnen pääiklažoummuid, peʹce âânn oummuid ooumžen, ij boʹŋŋjemkäuʹnnen. Vasttõsvuõđlaž turistt silttad väʹldded lokku mäʹtǩǩpääiʹǩ pirrõõzz da oummuid tobdstõõđeeʹl ääv miõlin kueʹsspäikka.