Jokkreddrääuh

Jokkredd kooll sääʹm nääʹlvuâkksaž lääʹjj mieʹldd aassâmpirrõʹsse. Sääʹm jokkšeeʹllemkulttuurin jeällsââʹj redd kooll dommpirrõʹsse, juʹn-ba šillju. Vueʹssen pääiʹǩ šelljpirrõõzzâst  lie õuddmiârkkân Teän da tõn čårrjooǥǥi reedd, kookk lie jäänaž jokkreedd privattmääddai puõtt. Reeddain lij võnnsi lââʹssen jeeʹres jällmõš, mâʹte sääiʹm koškkmen da puâđđšeeʹllemneävv. Pääiklaž oummu ciʹsttje kueiʹmeez reedd da cõgldõõzzteʹmes leʹbe hääiʹtʼteʹmes jååttmõš põõrtâst jiiʹjjes riddu lij oummuid jijstes seʹlvv äʹšš. Määŋg vuâra põõrtin vuäinn vuõiʹǧǧest riddu da pâʹjjelmeärrsaž liikkummuž võnnsi da kueʹllšeeʹllemneävvai ââlda ââʹnet põrtträäuh neeuʹrteeʹjen. Puk kueʹllšiiʹllituriist  jie fiʹtte privattmääddai puõtt åårrai reeddai miârktõõzz da säʹmmlai nääʹlvuâkksaž lääʹjj, peʹce joʹrdde, što mâŋŋa ko seeʹst lij haʹŋǩǩuum reddšeeʹllemlååʹpp lij seeʹst vuõiggâdvuõtt šeeʹlled juõʹǩǩ sââʹjest , mâʹte oummui jiiʹjjes võõnâs-säätkain.