Stereotypia

Stereotypia lij põõšši, õõutpeällsaž, veeiduum da õõutǩeärddsiʹžžen tuejjuum, määŋg vuâra negatiivlaž da leeiǥtõllum åskkmõš tiõttum ooumažjoouk leʹbe tiõttum ooumažjouʹǩǩe kuulli õõut oummu aaibšum jiõččvuõđin kõõččmõõžžâst åårrai joouk oudsteeʹjen. Sääʹmvuõđ äuʹǩǩenõõʹnni maatkčummšest kõskksaž stereotypiaid koʹlle sääʹmpihttsid jeuǯǯai jeuǯǯmõõžž di äʹrbbvuõđlaž sääʹm raajâlm. Jeuǯǯum sääʹmpihttsi kuʹǩes âânnmõš sääʹmvuõđ äuʹǩǩenõõʹnni maatkčummšest lij mottam sääʹmpihttsid sääʹm-maatkčummuž synonyymân leʹbe vuâđđrekvisittân nuʹtt, što maatkčemouddaz jeät vieʹltǩani ǩiõččlõsttu sääʹm maatkčemouddsen, jõs tõʹst ij leäkku sääʹmpihttsid õõʹnni ooumaž mieʹldd. Lââʹssen maatkčummšest hoʹhssjum äʹrbbvuõđin, mâʹte Lapin kaste -ouddsest, åålǥpeällsa lie pohttam ouʹdde vännšeei da vueʹllärvvsaž koov säʹmmlain ǩiõpp-, sähss da neeiʹbin heillai õõutǩeärddsaž alggaassjen. Näkam kovv säʹmmlain lij nuʹtt neeuʹrteei ko še ǩeeʹles, ko tõt pohtt ouʹdde “sääʹmvuõđ” sääʹmkulttuuʹre jâkk hääʹmest.