Lagasborramuš

Eana- ja meahccedoalloministeriija meroštallama mielde lagasborramuš oaivvilda erenomážit báikkálašborramuša, mii ovddida guovllu ekonomiija, barggolašvuođa ja borramuškultuvrra. Dat lea buvttaduvvon ja joatkkagieđahallon báikkálaš vuođđoávdnasiin ja márkanastojuvvo ja golahuvvo iežas guovllus, mainna oaivvildit eanagotti dahje unnit guovllu.

Viidásabbot lagasborramuš oaivvilda borramuša, mii lea buvttaduvvon, bivdojuvvon, čoggojuvvon dahje šaddaduvvon nu lahka dan geavahanbáikki go vejolaš, ja nu ahte adnojuvvo ávkin báikkálaš luondduriggodagat ja máhttu. Sámiid ruovttuguovllus lagasborramušat leat ovdamearkan bohccobiergu, guolli, fuođđu, muorjjit, guobbarat, urttat ja eará luonddubuktagat, mat háhkkojit vásttolaččat ja ehtalaččat suvdilis geavahusa prinsihpaid mielde ja dávjá árbevirolaš vugiiguin.

Sámekultuvrras lagasborramuš gullá nannosit árbevirolaš ealáhusaid ja kultuvrra bistevašvuhtii ja maid árbevirolaš dihtui (ärbivuáválâš tiätu, äʹrbbvuõđlaž teâtt, perinteinen tieto). Dat laktása luonddu birrajođu čuovvumii, jahkodatritmii ja iešbirgenláhkái. Lagasborramuša mearkkašupmi ii noga borramuššii – dan mielde sirdásit maiddái dáiddut, muitalusat ja searvvušlaš geavadagat buolvvas nubbái.

Vásttolaš ja ehtalaččat suvdilis sámemátkeealáhusas lagasborramuš sáhttá oidnot ovdamearkan mállásiin, main atnit ávkin albma láhkai báikkálaš vuođđoávdnasiid ja main muitalit daid álgovuođus ja maiddái oktavuođas duovdagii, lundui ja kultuvrii (maiddái sámegillii). Lea dehálaš, ahte lagasborramuš ovdanbukto mátkeealáhusas rivttes kultuvrralaš oktavuođas ja ahte dan geavaheapmi doarju servoša ja ehtalaččat suvdilis ovdáneami – ná nannet sihke ehtalaš mátkeealáhusa ja sámi kulturárbbi seailuma.