Dološ vieruiduvvanriekti (tapaoikeus)

Luonddu suvdilis ávkkástallan leamašan čađa áiggiid dehálaš sápmelaččaide ja sin árbevirolaš ealáhusaide, danin go luondu ja eana leat ealihan sápmelaččaid. Luonddu máŋggabealatvuhtii vuođđuduvvi sápmelaš vieruiduvvanriekti stivre árbevirolaš eanangeavaheami, servodaga gaskavuođaid eanangeavaheami hárrái, návddašanguovlluid prinsihpaid ja stivre luondduresurssaid ávkkástallama suvdilit sápmelaš riekteáddejumi mielde. Sápmelaččat leat láven čađa áiggiid lubmet čakčagease ja servodagas lei sánehis soahpamuš das gokko ja guđe luomejeakkis iešguđet bearaš lupmii. Seamma sánehis soahpamuš, man servodaga lahttut gudnejahtte, guoskkai maiddái guolástanbáikkiid, rievssatgárduma, boaldinmuoraid váldima, gámasuidnema ja jeageldobohagaid.