Sápmelaččaid oktavuohta luondduin (saamelainen luontosuhde)

Sámi doabamáilmmis olmmoš, luondu ja giella eai earuhuvvo nuppiin. Sámegiella speadjalastá birrasa heakkalaš ja heakkahis luonddu vuđolaš ja dárkilis dovdama ja olbmo ja luonddu gaskasaš lagaš ja dárkilit guorahallon vuorrováikkuhusa. Luonddubiras, kulturbiras, sosiálalaš biras ja gielalaš biras ráhkadit oppalašvuođa, birasdoahpaga, man galgá guorahallat oktan ollisvuohtan, go dat leat gitta nuppiin. Sámiid eallinvuohki lea vuogáiduvvan vejolašvuođaide ja ráddjehusaide maid luonddubiras addá. Sámiide ja sin árbevirolaš ealáhusaiguin bargamii eallineaktu leamašan čađa áiggiid luonddu suvdilis geavaheapmi.