Eamiálbmot (alkuperäiskansa)

ON árvvoštallá ahte máilmmiviidosaččat leat badjelaš 370 miljovnna eamiálbmoga sullii 70 riikkas buot kontineanttain main olbmot orrot, gitta Árktalaš guovllu rájes gitta Jaskesábi lulágeahčai. Sámit leat Eurohpa Uniovnna guovllu áidna eamiálbmot. Sámiin lea iežas historjá, giella, kultuvra, ealáhusat, eallinvuohki ja identitehta. Suomas vuođđoláhka dorvvasta eamiálbmogin sámiid vuoigatvuođa giela ja kultuvrra bajásdoallamii ja ovddideapmái sihke gielalaš ja kultuvrralaš iešstivrejupmái. Guovddášguovlu gos sámit ásset Suomas, Ruoŧas, Norggas ja Ruoššas gohčoduvvo Sápmin.