Aldapurrâmuš

Eennâm- já meccituáluministeriö miäruštâllâm mield aldapurrâmuš uáivild eromâšávt páihálâšpurrâmuš, mii oovded kuávlu ekonomia, pargolâšvuođâ já purrâmuškulttuur. Tot lii pyevtittum já ovdedum páihálijn amnâsijn já markkânistojeh já kiävttojeh jieijâs kuávlun, mii uáivild eennâmkode tâi tađe ucceeb kuávlu.

Vijđásubbooht aldapurrâmuš uáivild purrâmuš, mii lii pyevtittum, pivdum, nurrum tâi šoddâdum nuuvt alda kevttimsaje ko máhđulâš, kevttimáin páihálijd luánduriggoduvâid já mättim. Sämmilij päikkikuávlust aldapurrâmuš lii ovdâmerkkân poccuupiärgu, kyeli, pivdoelleeh, myerjih, kuobbâreh, njaddâšadoh já eres luándupyevtittâsah, moh skáppojeh ovdâsvástádâslávt já eettisávt kilelis kiävtu prinsiipij mield já távjá ärbivuáválij vuovijguin.

Sämikulttuurist aldapurrâmuš lii fastâ uási ärbivuáválij iäláttâsâi já kulttuur jotkuuvâšvuođâst sehe ärbivuáválii tiäđust (äʹrbbvuõđlaž teâtt, árbevirolaš diehtu, perinteinen tieto). Tot lohtâs luándu pirrâjotteem čuávumân, ihásâšriitmân já jiešráđálâšvuotân. Aldapurrâmuš merhâšume ij rajašuu ravâdâsân – ton mieldi sirdâšuveh meid tááiđuh, mainâseh já siärvusliih vuáháduvah suhâpuolvâst nuubán.

Ovdâsvástádâslii já eettisávt kilelis sämimaađhâšmist aldapurrâmuš puáhtá oinuđ ovdâmerkkân málásijn, main kiävttojeh puigâ páiháliih amnâseh já main muštâluvvojeh toi algâvuolgust já ohtâvuođâst enâdâhân, luándun já kulttuurân (ml. sämikielân). Lii tehálâš, ete aldapurrâmuš oovdânpuáhtoo maađhâšmist rievtis kulttuurlii ohtâvuođâst já ete ton kevttim tuárju siärváduv já eettisávt kilelis ovdánem – návt nanoduvvoo sehe eettisii mađhâšem já sämmilii kulttuuräärbi siäilum.