Meahcásteapmi

Meahcásteapmi oaivvilda luonddudilát fuođđoealli bivdima, goddima dahje sállaša váldima lágas ásahuvvon vugiiguin ja ráddjehusaid mielde. Sámiid ruovttuguovllus meahcásteapmi lea goittotge maiddái árbevirolaš ealáhus ja gullá kulturárbái, mii čatnasa borramušsihkkarvuhtii, luonddulohkandáidui, báikkálaš meahcástanvieruide ja buolvvas nubbái sirdásan árbevirolaš dihtui.

Sámeservošis meahcásteapmi lea maiddái dehálaš oassi borramušdorvvolašvuođas ja identitehtas. Vásttolaš ja sámekultuvrra gudnejahtti meahcásteami eaktun lea, ahte guovllus čuovvut báikkálaš vieruid ja vuhtiiváldit maiddái eará sámiid árbevirolaš ealáhusaid erenomáš dárbbuid. Ná sihkkarastojuvvo sihke fuođđu ja luonddu gudnejahttin ja vuhtiiváldin ja kultuvrralaččat ja sosiálalaččat suvdilis meahcásteami bistevašvuohta. Gudnejahtti ja vuhtiiváldi oainnut báikkálaš geavadagain nannejit ovttaveardásaš deaivvadeami ja geahpedit ruossalasvuođaid.

Dallego meahcástanmátkeealáhusain bargat vásttolaččat ja ehtalaččat suvdilis vugiin, meahcásteapmi plánejuvvo ovttas báikkálašservošiin (mielde maiddái boazodoalu oassebealit) ja meahcásteapmi čujuhuvvo guvlui, mii ii leat dehálamos servoša iežas dárbbuide, ja dohko, gos dat ii hehtte bohccuid iige boazobargguid. Sámiid ruovttuguovllus bivdobeatnagiid galgá skuvlet leat beroškeahttá bohccuin, ja daid galgá geavahit vásttolaččat. Sállašiin galgá meannudit ja dan galgá gieđahallat, nu ahte gudnejahttá ja atná dan ávkin máŋggabealagit. Vásttolaš meahcásteaddjit dovdet, gudnejahttet ja vuhtiiváldet meahcástandorvvolašvuođa ja luonddusuodjaleami áššiid buot doaimmainis, mat gullet meahcásteapmái. Olgobáikegottálaččaid meahcástanmátkkošteapmi lea lobálaš dušše, jos dat dáhpáhuvvá láhkaásaheami mielde dan láhkai, ahte dat ii dorvvohuhte sámeservoša árbevirolaš geavaheami, luonddu máŋggahámatvuođa dahje eallináliid suvdilvuođa.