Láhkaásaheapmi (lainsäädäntö)

Turistta lea buorre muitit, ahte son ii leat gasku guoskameahttun meahcceguovllu, mas ii leat makkárge olmmošdoaibma dahje lágat mat ráddjejit dan. Sápmelaččaid ruovttuguovllus atnit seamma lágaid ja buriid geavadagaid go earáge Suomas dainna spiehkastagain, ahte davimus Suomas lea lassin erenoamášláhkaásaheapmi, man galgá vuhtiiváldit go johtá viiddes duolbasiin, maid muhtumat dollet guoros sadjin masa olmmoš ii leat guoskan dahje oaidnán. Amma oahpásmuvat ovdal iežat galledeami ruovttuguovllu guoski láhkaásaheapmái. Dehálaš lágat leat ee. boazodoalloláhka, luonddusuodjalanláhka, dološmuitoláhka, birassuodjalanláhka, guollebivdoláhka (erenoamáš njuolggadusat guovlluid mielde), meahccebivdoláhka, meahcceguovloláhka ja meahccejohtalusláhka.