Kulturárbi

Kulturárbái gullet doložis árbejuvvon ávnnaslaš ja ávnnahis áššit dahje geavadagat, mat speadjalastet olbmuid árvvuid, oskumušaid, dieđuid ja árbevieruid. Kulturárbi lea proseassa, masa gullet sierra áiggiin sierralágan árvvut ja mearkkašumit ja daid gaskkusteapmi ovddos guvlui.

Dán oktavuođas kulturárbi oaivvilda sámiid ávnnaslaš ja ávnnahis ealli árbbi, mii sirdása buolvvas nubbái ja ovdanbuktá sápmelaš identitehta, máilmmigova, árvvuid, historjjá ja luondogaskavuođa. Kulturárbái gullet ee. gielat, árbevirolaš diehtu ja dáiddut, oskumušat, máilmmigovva, dávvirat ja maid báikkit ja duovdagat. Kulturárbi lea nuppástuvvi ja aktiivvalaš oassi sámeservoša eallimis.

Kulturárbi lea eamiálbmot sámiid opmodat, ja dan seailluheapmi, ovdanbuktin ja ávkkástallan mátkeealáhusas gullá kulturhálddašeaddjiid mearridanváldái. Kulturárbbi geavaheapmi mátkeealáhusas eaktuda FPIC-prinsihpa mielde miehtama ja dan suodjaleapmi lea vásttolaš ja ehtalaččat suvdilis sámemátkeealáhusa váimmus.