Guottet (vasomisaika)

Bohccuide galgá sihkkarastit guohtonráfi birra jagi, muhto erenoamážit giđđadálvve ja guottetáigge, mii lea boazodoalu dáfus kriittalaš áigi. Dalle guohtonráfi lea vealtameahttun, dasgo čoavjjehat leat hearkkimusat ja daid muosehuhttima dihte bohccot sáhttet reitot, olggudit miesi ja maiddái miessejámut lassánit. Giđđadálvve ja giđđat bohccuid galgá nappo guođđit áibbas ráffái ja daid ii oaččo oktage olggobeale olmmoš lobi haga lahkonit dehe heađuštit mange ládje. Erenomážit guottetbáikkit galget guđđojuvvot buot turismadoaimma olggobeallái, iige guottetbáikkiid galgga lahkonit almmá áššáigullevaš boazodolliid dehe bálgosa iešdáhtolaš álgaga dehe lobi haga.