Pygálys

Pygálys ( pikalõs, rátkkašeapmi/bigálus, poroerotus) lii puásuituálu tehálâš pargomuddo, mii tábáhtuvá jyehi ive já mast poccuuh norrojeh vijđes-uv kuáttumkuávluin rätkimááiđán já rátkojeh sierâ tárguttâssáid. Pygálysah uárnejuvvojeh ärbivuáválávt čohčuv, kuás poccuuh ucâluveh luándulávt sijdáid. Šoŋŋâdâhnubástus mield pygálysâi äigimuddo lii kuuloold sirduumin tälvimánuppoojijd. Pygálysâst poccuuh lohhojeh vittáin, rátkojeh njuovvâmpoccuuh já juáhhojeh lohopoccuuh jieijâs omâsteijeid. Pygálys lii tehálâš uási puásuituálust, mii lii ohtâ sämmilij ärbivuáválijn iäláttâsâin.

Sämmilij päikkikuávlust pygálys lii sämmilii kulttuur já iäláttâshárjuttem uási. Tot lii siijdâi já suuvâi siärvuslâš tábáhtus, mast paijeentuállojeh sosiaalliih koskâvuođah já sirdoo ärbivuáválâš tiätu, om. säänih já mättim, puáttee suhâpuolváid. Pygálysân kulá meid kulttuurlii jotkuuvâšvuođâ olleemvuotâ, tastko tot norá siärváduv oohtân já naanood puásuituálu sajattuv iäláttâssân já kulttuurvyehhin. Ellei pyereestvaijeem lii tehálâš uási sämmilii puásuituálust já poccuin viggeh anneeđ huolâ huolâlijn já rávhálijn kieđâvušmijn.

Pygálysân lohtâseijee mađhâšem lii máhđulâš tuš puásui-iššeed já pygályssáid uásálistee ulmui luvvijn já tienuuvt, ete tot ij hettii pargo ovdánem, pargotorvolâšvuođâ, ellei pyereestvaijeem ige puásuituálu ärbivuáválijd vuáháduvâid. Pygálys ij lah ávus keččeid kulttuur haldâšeijee lovettáá já huolâlii munevuávámttáá. Čuovâkuvviimist já čuovâkuuvij almostitmist kalga sooppâđ sierâ kuuvijn uáinojeijee ulmuiguin, poccui omâsteijeiguin sehe koččâmušâst orroo palgâsáin (tâi ton ovdâsteijein, tego puásui-išedáin). Lasseen kalga kunnijâttiđ siärváduv miärádâsâid tast, uážžu-uv pygálystábáhtus kuvviđ já magarijn ohtâvuođâin kuuvijd puáhtá kevttiđ.