Porrmõšturismm

Vaʹstteemvuõđlaž porrmõšturismm õhttad porrmõšjeäʹlstõõzzid da porrmõškulttuur vaʹstteemvuõđlaž da eettlânji ǩeâllʼjeei sääʹmturiism vuâđđjurddjid: pirrõõzz ciʹsttjummša da lokku väʹlddma, sosiaalʼlaž, kulttuursaž, ekolooglaž da tällõõzzlaž vaʹstteemvuõʹtte, ǩeâllʼjemvuõʹtte da ǩiõrddâmvuõʹtte. Täävtõsân lij minimâʹstted turiism negatiivlaž vaaiktõõzzid äimmõʹsse da luõttu di tueʹrjjeed pääiklaž õõutstõõzzid da jieʹllemvuõʹjjid jeeʹrab mieʹldd äuʹǩǩeeʹl âʹlddporrmõõžž.

Säʹmmlai dommvuuʹdest porrmõšturismm õhttan ravvsânji äʹrbbvuõđlaž jieʹllemvuõʹjjid da luâttaunnsi äuʹǩǩummša vaʹstteemvuõđlaž da eettlânji ǩeâllʼjeeinalla. Porrmõšturismmouddaz vuäiʹtte leeʹd õuddmiârkkân puõccu vuâǯǯa, kuâlla, šillʼja, muõʹrjid da yyrtid vuâđđõõvvi veär di tõid kuulli valmštem- da seillamäʹrbbvuõđ.

Vaʹstteemvuõđlaž da eettlânji ǩeâllʼjeei sääʹm porrmõšturismm õõudald, što:

• Toiʹmmjummuš äuʹǩǩad še pääiklaž õõutstõõzz da ravsmâtt kulttuur jieʹllemviõǥǥ (õuddm. vaʹstteemvuõđlaž da eettlânji ǩeâllʼjeei vueʹllhaʹŋǩǩeempääiʹǩ).
• porrmõõžž da kulttuur mainnsen raajjmõš šâdd säʹmmlai jiiʹjjez määinaivuiʹm, muuʹttǩâni äʹrbbvuõđid.
• õutstõs preemm ouddsi da mainnsi čuäʹjtummuž.
• aunnâz lie seuʹrrjemnalla da puuʹtʼtum leʹbe haʹŋǩǩuum vaʹstteemvuõđlaž da eettlânji ǩeâllʼjeeinalla.

Visit Finlaand Kestävän ruokamatkailuopas (2024) mieʹldd porrmõšturismm miârkkšââvv turiism, koʹst kõskksâjjsaž motiivân lie porrmõš da tõõzz kuulli aiccmõõžž. Turistt ååcc pääiklaž smääǥǥaid, aunnsid, valmštemnaaʹlid da porrmõškulttuur, koi mieʹldd peäss pääiʹǩ auteentlaž tobdlma. Porrmõšturiʹsmme vuäiʹtte siskkned õuddmiârkkân restrantt- da dååmapoorrmõõžž, uuʹlecporrmõš, porrmõšfestivaal, markknin jååttmõõžž, porrmõšǩeäin, kueʹssjummuž jolstõkpiijjâm- da tiʹsllʼjempaaiʹǩin, luâttaunnsid kuulli reeis (mueʹrjjuussmõš, kuõbbârnoorrmõš, kueʹllšeellmõš), di ohjjuum veärr-raajjmõš da mainnsallaš porrmõšaiccmõõžž.

Porrmõšturiism ǩieʹssi tuejjeei lie aainâs:

• Pääiklažvuõtt da sesoŋŋ
  • puuʹttes aunnâz, eeʹjjpooddi rytmm
• Mainnsallašvuõtt da kulttuur
  • porrmõõžž tuâkkaz, äʹrbbvuõđ da historia
• Puuʹttesvuõtt da vaʹstteemvuõtt
  • ekolooglaž aunnâz, ǩeâllʼjeei vaʹlljõõzz
• Jeäʹlstõõzzlažvuõtt da vuässâttmõš
  • maatkčeei jiõčč peäss ǩiččlõddâd, mättjed da vuässõõttâd