Heterogeenlažvuõtt

Sääʹmkulttuur ij leäkku tåʹlǩ puäʒʒ, sääʹmpiiutâs da kååvas, håʹt maatkčemindustria nuʹtt täujja oudd fiʹttjed. Ij leäkku tåʹlǩ õhtt nääʹll õlmmeed sääʹmvuõđ da sääʹmkulttuur. Puäʒʒ, sääʹmpiiutâs da kååvas eeʹttkâʹstte tåʹlǩ vueʹzz sääʹmkulttuur määŋgnallšem õlmmeemhäämain. Sääʹmkulttuur lij heterogeenlaž leʹbe määŋghämmsaž, leäđǥteei, reeʹǧǧes, äigga da päikka di vaaldšeei jieʹllemtuejjeeʹjid šiõttlõõvvi jieʹllemnääʹll. Tõõzz jiânnai vaaikat pirreei, jieʹlli kulttuurkueʹstelm da tõn ǩeâllʼjeei äuʹǩǩummuš. Õuddmiârkkân sääʹmǩiõll, mainnâz, musikk di sääʹmkulttuur jäänmõsân kuâsttjeei symbool mâʹte sääʹmpihttâz da sääʹmǩiõtt-tuâj lie nâânas õhttvuõđâst jm. äʹrbbvuõđlaž sääʹmjieʹllemvuõʹjjid. Tõin šâdd rääʹtǩteʹmes obbvuõtt, koonn juõʹǩǩ sueʹrǧǧ taarbaš nuuʹbb jieʹllemviõkksen seillam diõtt vueiʹtlvââʹsteeʹl sääʹmkulttuur seillmõõžž, õuddnummuž da serddmõõžž pueʹtti puõlvvõõǥǥid. Jos õuddmiârkkân õhtt kulttuur suõʹrjin jäukk leʹbe tõn toiʹmmjemvuʹvdd rajjtââvv, teâttje täk vaaiktõõzz tâʹlles nuuʹbb åʹrnn.