Käuʹnnen âânnmõš

Aainâs alggmeerõutstõõzzid da tõi vuäzzlaid täujja ââʹnet turiismâst boŋŋjemkäuʹnnen da siʹjjid  ââʹnet mâʹte sij leʹčči luâttpirrõʹsse ǩieʹssi rekvisiittân. Täʹl väjldââʹttet, što sij lie oummu, kooi päikka turistt lie puättam kueʹssen. Lääʹddjânnmest säʹmmlai käuʹnnen âânnmõš da eksotisâsttmõš turiismâst, åålǥpeällsai čuäʹjtem vââǥǥlaž da čõõđ čeäkkram stereotypiaid vuâđđõõvvi representaatioi mieʹldd, lij juätkkjam juʹn looʹjid iiʹjjid. Turiism positiivlaž vaaiktõõzzid vuäitče vuäǯǯad kueʹsttma säʹmmlaid kuõskki tuõđmeâldla teâđ liâvvtem mieʹldd, kååʹtt šâdd kulddleeʹl säʹmmlai jiiʹjjeez jiõn da tuõivvjid tõʹst, mõõnn nalla sij jiijj haaʹleʹče jiiʹjjeez čuäjtõõllâd da šõddâd vuõinnum. Vasttõsvuõđlaž turistt vaʹlljad vasttõsvuõđlaž da eettlânji ǩeâllʹjeei sääʹmmouddaz da -kääzzkõõzz.