Uásálistittem

Uásálistittem lii proosees, mast ovtâskâs ulmuuh, juávhuh tâi siärváduvah váldojeh fáárun miärádâstohâmân, vuáváámân, olášutmân já árvuštâlmân. Tot lii vyehi aktivistiđ já movtijdittiđ ulmuid uásálistiđ sehe finniđ uásálâšvuođâ vuáttámušâid.

Uásálistittem ulmen lii nanodiđ uásálâšvuođâ já siärvuslâšvuođâ, lasettiđ luáttámuš, oohtânkulluuvâšvuođâ já vaikuttem máhđulâšvuođâid sehe pyerediđ miärádâstoohâm tääsi, ávusvuođâ já čonâdâttâm. Tom puáhtá olášuttiđ sierâ taasijn já konteevstâin, tego siärváduvâin, pargosoojijn, škovliimist já politiikist.

Uásálistittem metodeh láá ovdâmerkkân almoliih kulâmeh, pargopáájáh, savâstâlmeh, koijâdâlmeh, foorumeh, uásálistittee vuávám já digitaalliih vuáđuh. Luhostum uásálistittemproosees váátá tiäđulii vuávám, vâi puohâi jienâ kulloo já uásálistem annoo merhâšitten já vaikutteijen. Uásálistittem lii ovdâsvástádâslii já eettisávt kilelis sämimađhâšem tehálâš uási.

Taan ohtâvuođâst uásálistittem uáivild proosees, mast sämisiärváduv jesâneh váldojeh fáárun sehe uđđâ mađhâšemtooimâ vuáváámân já jo orroo mađhâšemtooimâ árvuštâlmân já oovdedmân. Uásálistittem puáhtá tárguttiđ meid puigâ vuárusavâstâllâm ovdâmerkkân talle, ko mađhâšeijeemeerijn láá hástuseh tâi ko miinii toimâvuovijd ij lah finnim siärváduv tuhhiittem. Máhđulâšvuođâi mield uásálistittem uulât meid miärádâstohâmân já olášutmân vuovvijn, mii kunnijât sämisiärváduv jiešmeridemvuoigâdvuođâ já äššitubdâmuš.

Uásálistittem uáivild puigâ oovtâstpargo já vuárusavâstâllâm huksim, mast siärvádâh pasta vaikuttiđ tooimâ siskáldâsân, ulmijd ja kulttuur oovdânpyehtimvuáhán jo arâdis muddoost, ovdil miärádâsâi toohâm. Tot tuárju sämikulttuur eellimvyeimi, viälttá hááituid já hiäđut siärváduv täsipiälásávt. Sosiaallii já kulttuurlii toimâlove juksâm váátá uásálistittee toimâvyevi.