Primitivisâʹsttem

Maatkčummšest primitivisâʹsttem teäddad da seämmast raʹvvai mõõnnâmäigga čõnnum jieʹllem-maall meâldlaž miõllkoov alggmeerast. Nuuʹbbi saaʹnivuiʹm primitivisâʹsttem tuärjjad museõsttum, mottjeǩani da mõõnnâmäigga årstam koov sääʹmõutstõõzzâst, koozz modeʹrnn jieʹllem ij leäkku veâl vuällam leʹbe koon čuõvtõs ij leäkku veâl peʹllstam. Primitivisâʹsttmin šõddeet koov “kuõskteǩani” da tiʹnt-aa “õlmm” meerast leʹbe luâttmeerast (lääddas “jaloista villeistä”), kååʹtt lij paaʒʒtõs mõõnnâm äiʹǧǧpõõʹjin. Sääʹm jiõglvaž äʹrbbvuõđ da myyttlaž mõõnnâmääiʹj teäddeem maatkčummšest primitivisâstt säʹmmlaid, tuärjjad da raʹvvai puästnallšem stereotypiaid da vââǥǥlaž representaatioid, koid ij kaunnu vaast ânnʼjõžääiʹj tuõttvuõđâst. Primitivisâʹsttem ij uuʹd maatkčummšest ouʹdde puhttum sääʹmvuõʹtte vueiʹttemvuõđ leeʹd vueʹssen tän peeiʹv jieʹlli da dynaamlaž kulttuurâst, peʹce tõn pääiʹǩ säʹmmlain uvddum kovv lokkad siʹjjid myystlaž mõõnnâmäigga.