Pååđai konteeʹkstest

Säʹmmlaid leʹbe sääʹmkulttuur ââʹnet maatkčummšest täujja passiivlaž rekvisittân, pääiklažeuʹnnen leʹbe eksoottlaž da primitiivlaž objeʹktten ratkkum kulttuurlaž konteeʹkstest. Jõs säʹmmla leʹbe sääʹmkulttuur jie vuõiʹǧǧest õhttân ouddsa leʹbe päikka, koon markknââʹstet, ij sääʹmvuõđ leʹbe sääʹmkulttuur symboolid leʹbe sääʹmǩiõl õõlǥ täin vuõʹjjin ââʹnned. Puk sääʹmvuõʹtte, sääʹmkulttuuʹre čuäʹjteei leʹbe õhttneei ââʹnnma âʹlǧǧe käunnʼjed sääʹmkulttuuʹre õhttneei vuõigg õhttvuõtt da miârktõs di sääʹmõutstõõzz sååvšummuš sääʹmkulttuur (ml. sääʹmǩiõll) âânnmõʹšše juõʹǩǩ vueʹjjest. Sääʹmvuõđin racstummuš leʹbe sääʹmkulttuur paaimteei äuʹǩǩenâânnmõš čaʹjjâtt õõʹnnʼjid jääutai leʹbe täättǩâni juʹrdded, što ooudas leʹčči säʹmmlaž.