Tavesämikielâ

Tavesämikielâ lii Suomâ stuárráámus sämikielâ já Tave-enâmijn enâmustáá kevttum. Tot sárnoo ärbivuáválávt Suomâst, Taažâst já Ruotâst. Puohâin sämikielâ sárnoin suullân 75-90% sáárnuh tavesämikielâ. Suomâst ton ärbivuáváliih sárnumkuávluh láá Ucjuuhâ, Aanaar, Iänudâh já Suáđigil taveuási. Tavesämikielâ sárnooh láá Suomâst motomeh tuhátteh. Suomâbeln sämmiliih já sämikielâliih láá eenâblohhoon tuš Ucjuv kieldâst (suulân 75 %).
Iänááš uási sämikielâ já sämikielâlii máttááttâsâst, tiäđusirdemist, kirjálâšvuođâst, musikkist já puoh almostittum sämikielâlii materiaalist lii tavesämikielâlâš. Suomâst, Taažâst já Ruotâst kuhháá pištám lädijduttempaje maŋa aalgij tavesämikielâ iäláskem jo 1960- já 1970-lovvoin. Tavesämikielâ ohtâlâš tave-eennâmlâš ortografia ađai čäällimvyehi tuhhiittui ive 1978. Kielâ kulloo já uáinoo onnáá peeivi pirrâ sämikuávlu.